23.04.2026
Оның
құрылысы мамыр айында басталып, 2029–2030 жылдары аяқтау жоспарланып отыр.
Алатау
қаласындағы Iconic Towers зәулім ғимаратының құрылысын бизнесмен Юрий Цхаймен
байланысты Alatau City Iconic Complex компаниясы жүзеге асырады. Бұл туралы
Forbes Kazakhstan редакциясының сұрауына жауап ретінде Алатау қаласы әкімдігі
хабарлады.
Iconic
Towers қашан салынады және қанша тұрады
Құрылыс
2026 жылдың мамыр айында басталады деп жоспарланған. Алдын ала ақпарат бойынша
жобаны іске асыру мерзімі шамамен төрт жылды құрайды, яғни зәулім ғимарат 2029
жылдың соңы — 2030 жылдың басында пайдалануға берілуі тиіс. Әкімдіктің
түсіндіруінше, қазіргі кезеңде жобаны алдын ала әзірлеу және жобалау-іздестіру
жұмыстары жүргізілуде.
«Аталған
жұмыстар жеке инвестициялар есебінен, сондай-ақ жеке инвесторға тиесілі жер
учаскесінде жүзеге асырылуда. Жобаның девелопері — «Alatau City Iconic Complex»
ЖШС», — деді қала әкімінің орынбасары Бориқан Әбдібаев.
eGov
деректеріне сәйкес, Alatau City Iconic Complex ЖШС-і Alatau City Properties
ЖШС-іне тиесілі. Соңғысының үш құрылтайшысы бар — Caspian Group (Юрий Цхайға
тиесілі), Юрий Цхай және Alatau Development Holding Ltd компаниясы.
Бұған
дейін айтылған мәліметтерге сәйкес, жобаға салынатын инвестициялар көлемі $800
млн-нан асады. Алайда жобаның түпкілікті құны мен оның қаланың инвестициялық
бағдарламасындағы орны әзірге нақты анықталмаған, деп нақтылады әкім орынбасары
Әбдібаев.
Сонымен
қатар, Ұлттық экономика министрлігінің мәліметінше, құрылыс мемлекеттік бюджет
қаражаты есебінен қаржыландырылмайды. Объект бойынша күрделі шығындардың
негізгі бөлігі жеке инвестициялар есебінен қамтамасыз етіледі.
«Iconic
Complex (ресми атауы Iconic Towers) зәулім ғимаратын салу жобасын іске асыру
аясында мемлекеттің қатысуы инженерлік желілер мен көлік қолжетімділігін қоса
алғанда, ілеспе инфрақұрылымды дамыту, сондай-ақ қолайлы құқықтық және реттеуші
ортаны қамтамасыз ету бөлігінде жүзеге асырылады», — деді вице-министр Бауыржан
Омарбеков.