25.05.2026
Жаңа жобалардың барлығын токендермен интеграциялау жоспарлануда.
2026 жылғы 8 мамырда Қазақстан Республикасының Президенті Қасым-Жомарт Тоқаев «Алатау қаласының арнайы құқықтық режимі туралы» Конституциялық заңға қол қойды. Аталған құжатқа сәйкес, Қазақстанның ең жас қаласында көптеген үдерістер еліміздің басқа өңірлерінен өзгеше ұйымдастырылатын болады. Бұл ерекшеліктер басқару жүйесінен бастап, шетелдік инвесторларға ұсынылатын түрлі преференцияларға дейінгі кең ауқымды қамтиды.
Атап айтқанда, арнайы құқықтық режим цифрлық технологиялар мен цифрлық активтерді пайдалануға да қатысты болады. 2026 жылғы 1 мамырдан бастап Қазақстанда цифрлық активтерге қатысты бірқатар рәсімдер жеңілдетілгенімен, Alatau City Authority қоры бас директорының орынбасары Арман Тастанбековтің айтуынша, Алатауда бұл бағыттағы реттеу одан да икемді болмақ.
Solana Summit Kazakhstan форумында сөз сөйлеген Арман Тастанбеков блокчейн технологиясы жаңа қаланың негізгі инфрақұрылымдық элементтерінің біріне айналатынын мәлімдеді. Оның айтуынша, Алатау қаласының даму басымдықтарының бірі цифрландыру болғандықтан, блокчейн технологиялары барлық негізгі үдерістерге енгізіледі.
«Болашақтың цифрлық қаласының дамуын блокчейн-инфрақұрылымынсыз елестету мүмкін емес. Ол қаладағы барлық әлеуметтік және экономикалық өзара іс-қимылдарды қамтамасыз ететін әмбебап қабат болып табылады», – деді Арман Тастанбеков.
Оның айтуынша, токенизация Алатауда толыққанды экожүйе ретінде дамытылады. Бұл тек криптовалюталарды пайдаланумен шектелмейді. Токенизация қала тұрғындарының өмірінің әртүрлі салаларын қамтып, негізгі цифрлық қағидаттардың біріне айналады.
Осыған байланысты Алатауда «әдепкі бойынша токенизация» (Tokenization by Default) қағидатын енгізу жоспарланып отыр.
«Бастапқы кезеңде біз қажетті негізді қалыптастырамыз: құқықтық реттеу жүйесін, мемлекеттік басқару тетіктерін, цифрлық сәйкестендіру құралдарын, активтер тізілімдерін, инфрақұрылымды және инвестицияларды қорғау механизмдерін құрамыз. Одан кейін токенизацияны жекелеген инфрақұрылымдық жобаларға және нақты активтерге негізделген жобаларға енгіземіз. Сонымен қатар өтімділік тетіктерін, талаптарға сәйкестік құралдарын, инвесторлармен коммуникация жүйелерін және нарықтық инфрақұрылымды дамытатын боламыз. Бұл нақты және цифрлық экономиканың барлық элементтері біртұтас кеңістікте өзара әрекет ететін Web3 негізіндегі экономиканың іргетасын қалайды», – деп түсіндірді Арман Тастанбеков.
Толығырақ сілтеме бойынша: https://nationalbusiness.kz/news/vseobshaya-tokenizatsiya-alatau-tsifrovoy-eksperiment-dlya-vsego-kazahstana/