Алатау қаласының мәртебесін конституциялық заңмен бекіту жоспарлануда

Алатау қаласының жедел дамуын қамтамасыз ету және Қазақстан Республикасының инновацияға бағытталған экономикасының тұрақты өсуін ынталандыру мақсатында Алатау қаласын дамытудың құқықтық негіздерін конституциялық заң деңгейінде бекіту қажет. Бұл туралы «Алатау қаласының ерекше мәртебесі туралы» Конституциялық заң жобасына арналған реттеуші саясаттың консультативтік құжатында айтылған.

Аталған конституциялық заң төмендегі құқықтық тетіктерді қамтамасыз етуі тиіс:  1) перспективалы кәсіпкерлік салаларына инвестиция тарту және инновацияларды енгізу арқылы Алатау қаласының әлеуметтік-экономикалық дамуын жеделдетуге мүмкіндік беретін ерекше институционалдық (нормативтік-құқықтық және ұйымдастырушылық) ортаны қалыптастыру; 2) Алатау қаласының дамуына бағытталған кез келген жеке инвестицияларды тарту және қорғау үшін сапалық жағынан жаңа институционалдық базаны қамтамасыз ету; 3) арнайы экономикалық аймақтың (АЭА) жұмыс істеу ерекшеліктерін қоса алғанда, басқарудың жетекші халықаралық тәсілдері мен тәжірибелерін қолдану.

Құжатта атап өтілгендей, жобаны іске асырудағы маңызды кезеңдердің бірі – 2023 жылғы 15 наурызда G4 City арнайы экономикалық аймағының құрылуы, ол 2023 жылғы 26 желтоқсанда Alatau арнайы экономикалық аймағы болып қайта аталды.

Қазақстан Республикасы Президентінің 2024 жылғы 9 қаңтардағы №432 «Алматы облысының әкімшілік-аумақтық құрылымындағы өзгерістер туралы» Жарлығымен облыстық маңызы бар Алатау қаласы құрылды, ал Қазақстан Республикасы Үкіметінің 2024 жылғы 17 мамырдағы №388 қаулысымен G4 City тұжырымдамасына негізделген Алатау қаласының бас жоспары бекітілді. Осылайша, Алатау қаласының дамуы Alatau АЭА мен бас жоспар шеңберінде жүзеге асырылып, жобаланған аумаққа жаңа мәртебе берілді.

Құжатта орталықтың табысты дамуының негізгі факторлары ретінде құқықтық режимнің тиімділігін қамтамасыз еткен мынадай шарттар көрсетіледі:

1)  конституциялық заң шетелдік инвесторлар үшін құқықтық режимнің айқын әрі түсінікті ережелерін, соның ішінде қолданыстағы заңнамадан кейбір ерекшеліктерді көздейді;

2)  конституциялық заң орталықтың басқару органдарына жекелеген мәселелер бойынша нормативтік актілерді дербес қабылдау құқығын береді;

3)  нормативтік құқықтық актілер жүйесіндегі конституциялық заңның жоғары заңдық күші, яғни оның кодекстер мен Қазақстан Республикасының заңдарынан басымдығы.

«Осыған байланысты Алатау қаласының жедел дамуын қамтамасыз ету және тұрақты экономикалық өсуді ынталандыру үшін ерекше мәртебені қалыптастыру мен реттеу тек жеке конституциялық заңды қабылдау арқылы ғана мүмкін. Бұл заң қолданыстағы заңдар мен кодекстерде көзделген мемлекеттік басқару мен қатынастарды реттеудің қалыптасқан шеңберінен тыс арнайы құқықтық режимнің, жергілікті басқару жүйесінің және ерекше құқықтық тәртіптің ерекшеліктерін бекітеді», – делінген хабарламада.

Толығырақ сілтеме бойынша: https://kaztag.kz/ru/news/status-goroda-alatau-gotovyatsya-zakrepit-konstitutsionnym-zakonom