21.05.2026
Қазақстан Премьер-министрінің орынбасары Қанат Бозымбаев 2026 жылғы 21 мамырда Үкіметтегі баспасөз мәслихатында жаңа Алатау қаласындағы жер мәселесі қалай шешілетінін айтты, деп хабарлайды Zakon.kz тілшісі.
Бозымбаевтың айтуынша, Алатаудағы кез келген қызмет бизнес-лицензия негізінде жүзеге асырылады.
«Егер кәсіпкерге, мысалы, қонақүй салу үшін жер телімі берілсе, онда нақты мерзім, инвестиция көлемі және жұмыс күші көрсетіледі. Егер ол белгіленген уақытта жобаны іске асырмаса, жер қайта мемлекетке қайтарылады, ал бизнес-лицензия алдымен тоқтатылып, кейін толықтай кері қайтарылады. Жер ешқашан шетелдік немесе отандық инвесторларға алыпсатарлық мақсатта берілмейді», – деді ол.
Оның сөзінше, жалпы Қазақстанда ауыл шаруашылығы мақсатындағы жерлерден басқа жерлер шетел азаматтарының жеке меншігінде бола алады.
«Алатауда да шамамен солай болады: мұнда ауыл шаруашылығы жерлері болмайды, өйткені бұл – қала аумағы. Біртіндеп ауыл шаруашылығы мақсатындағы жерлер басқа санатқа ауыстырылады. Қалған жерлердің барлығы конституциялық заңмен реттеледі. Қазіргі таңда 88 мың гектар жердің 41%-ы жеке меншікте, әртүрлі жолдармен алынған және қолдан қолға өтіп отырған. Егер бұл ауыл шаруашылығы жері болмаса, Қазақстан азаматтарының ол жерді Қазақстан азаматына да, шетелдікке де сатуына ешкім тыйым сала алмайды», – деп қосты Бозымбаев.
Оның айтуынша, негізгі мәселе — жерді қалай пайдалануында.
«Егер біреу ол жерде, мысалы, казино салғысы келсе және ол қаланың бас жоспарына сәйкес келмесе, онда мұндай нысан салуға рұқсат берілмейді. Ал егер сәйкес келсе, онда ол Alatau City Authority ұйымынан бизнес-лицензия алған жағдайда ғана құрылыс жүргізе алады. Қаладағы жердің 41%-ы бұрыннан жеке меншікте. Ал ауыл шаруашылығы жерлері жеке меншікте емес, олар жалға берілген», – деп түйіндеді Премьер-министрдің орынбасары.