07.06.2026
Мемлекет басшысы Алматы облысына жұмыс сапары барысында Алатау қаласын дамыту мәселелері жөнінде кеңес өткізді. Кеңес барысында әлемге бүгінгі заманауи Сингапурды қалыптастыруға зор үлес қосқан, елдің негізін қалаушы Ли Куан Юдың шәкірті Вонг Хеанг Файн Алатау қаласының даму тұжырымдамасын таныстырды.
Вонг Хеанг Файн Президентке биіктігі 272 метр болатын зәулім ғимарат орналасатын Iconic Complex кешенінің жобасын ұсынды. Кешеннің сәулеттік тұжырымдамасын Дубайдағы Burj Khalifa мұнарасының жобасын әзірлеген халықаралық команда дайындаған.
«Бұл – қаламызда жүзеге асырылып жатқан алғашқы ірі жоба. Көріп отырғандарыңыздай, кешен жаңа іскерлік ауданның дәл орталығында орналасады. Iconic Complex жобасының табысты аяқталуы әлеуетті инвесторлар үшін маңызды белгі болмақ. Сондықтан құрылыстың белгіленген мерзімде аяқталуы және жобаның ең жоғары сәулет-құрылыс әрі инженерлік стандарттарға сәйкес іске асырылуы аса маңызды. Зәулім ғимараттың биіктігі шамамен 272 метрді құрайды. Бұл, сөзсіз, Алатау қаласындағы ең биік ғимарат болады», – деді Вонг Хеанг Файн.
Өз кезегінде Юрий Цхай Алатау қаласына ерекше құқықтық мәртебе берілгеннен кейін жобаларды іске асыру қарқыны айтарлықтай артқанын атап өтті.
«Құрылыс жұмыстарын әлемдегі ең ірі құрылыс корпорацияларының бірі – CSCEC жүзеге асырады. Компания Қытайдағы және әлемнің басқа да елдеріндегі көптеген биік ғимараттардың құрылысын салған. Жобаның сейсмикалық қауіпсіздігіне америкалық және жапониялық сарапшылар бағалау жүргізеді. Сонымен қатар жобаны іске асыруға халықаралық деңгейдегі жетекші компаниялар тартылған», – деді Юрий Цхай.
Бүгінде Алатау қаласының аумағы 88 мың гектарды құрайды. Қаланы дамыту 2050 жылға дейінгі кезеңге жоспарланып, төрт болашақ ауданның қалыптасуын көздейді. Қазіргі уақытта мұнда басқарудың жаңа моделі енгізіліп, магистральдық инфрақұрылым салынуда және алғашқы тұрғын аудан – Gate City қарқынды дамып келеді.
Қала аумағында бес ірі кәсіпорын жұмыс істейді, ал инвестициялық жобалар портфелінің жалпы көлемі 2 триллион теңгеден асты. Олардың қатарында Орталық Азиядағы ең ірі PepsiCo картоп өңдеу зауыты, Mars Petcare компаниясының заманауи жем өндірісі, KHAN TENGRI BIOPHARMA биофармацевтикалық кешені және ірі логистикалық кластер бар.
Сонымен қатар сарапшылардың пікірінше, болашақ қаланы қалыптастыру сәулеттік жобалар мен зәулім ғимараттардан ғана басталмайды. Мұндай ауқымды бастамалардың табысты жүзеге асуы ең алдымен сапалы инженерлік және көлік инфрақұрылымына байланысты. Электр энергиясы, сумен жабдықтау, автомобиль жолдары, байланыс желілері сияқты базалық инфрақұрылым толық қамтамасыз етілген жағдайда ғана жоспарланған жобаларды тиімді іске асыруға мүмкіндік туады.
Толығырақ сілтеме бойынша: https://www.youtube.com/watch?v=W7AtM2arpys